Geloofsgedigte deur Cas Vos

Uitgewer: Naledi, 2024

Resensent: Rethie van Niekerk

Geloofsgedigte is die derde boek oor die Psalms uit Cas Vos se vrugbare pen. Hoewel hierdie werk bou op die voriges, word hier meer aandag gegee aan die prediking van die Psalms.

In Geloofsgedigte vind ons ’n vakkundige se goed onderlegde oordenkings oor die Psalmboek en bepaalde temas binne die Psalms, dikwels aan die hand van spesifieke Psalms. Vos bied vir sy leser ’n goeie teologie oor die Psalms, verweef met nadenke vir prediking. Dit alles gebeur op ’n poëtiese ritme, met aanhalings van gedigte deur onder andere Ina Rousseau, IL de Villiers, Sheila Cussons en, natuurlik, die skrywer self.

Sonder om die teks direk op die huidige konteks te verplaas, word die geloofsgedigte van die Psalms in gesprek gebring met vandag, soos byvoorbeeld die oorloë in die Oekraïne en Palestina, of selfs die skrywer se eie wonderbaarlike ervarings van engele se teenwoordigheid.

Hierdie werk is tegnies, poëties, teologies, annekdoties – dalk veral bedoel vir lesers wat gemaklik is met die vakkundige taal van die teologie. ’n Indeks van Skrifverwysings sou toekomstige raadpleging vergemaklik.

Beskikbaar by Naledi.

Ds Rethie van Niekerk is predikant by die NG Kerk Driehoek in Vanderbijlpark.