Skaterlag, begroting, kerk? Op ’n Lentesondag het hierdie drie konsepte mekaar kon vind by die NG Gemeente Durbanville-Bergsig wat gelag en handegeklap het terwyl Grietjie die pop finansiële ‘groot woorde’ mishoor. Alida Vorster vertel meer oor hierdie eerste wat hulle gemeente so geniet het.

Die idee vir ’n poppekas as ’n speelse invalshoek om oor die gemeente se finansies terugvoer te gee het gekom van ’n ingenieur en sy onderwyservrou. Murray Steenkamp is die voorsitter van die kerkraad. Sy vrou, Stephanie, is ’n wiskunde-onderwyseres.

Die oogmerk was terugvoer oor die laaste vier jaar. Deeglike voorbereiding het ingegaan in die aanbieding. Murray het die finansiële terugvoer verpak in ses PowerPoints terwyl Stephanie vir ’n humoristiese teks gesorg het. Hulle natuurlike gawes het dit in ’n taamlike kort tydjie laat gebeur.

’n Poppekas het ’n kreatiewe manier gebied om die gemeente se aandag te prikkel en te hou terwyl hulle baie het om na te luister. Dieselfde inligting is ook in die kerk se nuusbrief deurgegee vir dié wat dit in groter diepte wil lees.

Ons gemeente het heelwat nuwe lidmate en dit was ’n manier om hulle op die hoogte te bring.

Ons sal so iets weer in die toekoms probeer.

• Alida Vorster hanteer kommunikasie, personeel en bestuur by die NG Gemeente Durbanville-Bergsig.