Ds. Jaco Botha is vanaf 1 Augustus 2024 aangestel by die Hugenote Kollege in Wellington om nuwe kwalifikasies in teologiese opleiding vir lidmate te ontwikkel en as koördineerder van die sertifikaat-programme in Teologie, waaronder die Bedienaarskursusse, op te tree.

Dit is luidens ‘n onlangse verklaring vanaf die kollege waarin ook genoem word dat hy tans besig is met navorsing oor die ontwikkeling van ’n nuwe missionale praktyk wat fokus op die formasie van dissipelskap deur oor grense te beweeg. Hy finaliseer sy PhD in die interdissiplinêre vakgebiede van Praktiese Teologie by Radboud Universiteit in Nijmegen en Sistematiese Teologie by die Universiteit van Stellenbosch.

As leraar in die NG Kerk is hy ook voorsitter van die Taakspan Afrika Ekumene en dien in die uitvoerende bestuur van die Diensgroep Getuienis. Verder het hy ook verskeie akademiese publikasies onder sy naam wat handel oor missionale ekklesiologie, geweld en publieke teologie. 

Hy was ook voorheen leraar by die Herenigde Gemeente van die VG Kerk en die NG Kerk op Bredasdorp.

Bron: Hugenote Kollege