Philip Coetzee van die Strand skryf: In ’n onlangse brief (getiteld “Hoekom die Bybel nie goeie maatstaf is nie”) op Die Burger se brieweblad, beweer die skrywer dat enigeen wat die Bybel as maatstaf vir etiese en morele gedrag wil gebruik, dit weer deeglik moet lees.

LEES OOK | Regstreeks: In aanloop tot PredikanteSAAMkoms 24-28 Augustus

Daarna word ’n reeks voorbeelde aangehaal: die seksuele beeldspraak in Esegiël 16 en 23, gedeeltes uit Hooglied, Lot wat sy dogters aan die skare wil uitlewer, Rut se ontmoeting met Boas op die dorsvloer, Amnon se verkragting van Tamar, en nog ander voorbeelde. Die gevolgtrekking is dat die Bybel daarom nie as morele standaard deur ’n rasionele mens aanvaar kan word nie.

Ek stem saam dat die Bybel deeglik gelees moet word. Maar juis daarom moet dit in sy geheel en binne konteks gelees word. Daar is belangriker vrae as bloot: “Watter verskriklike dinge staan in die Bybel?”

Wanneer ’n mens ’n boek resenseer, kan jy nie bloot die mees skokkende gedeeltes daaruit haal en dan beweer dat jy die skrywer se boodskap verstaan nie. Jy moet die hele verhaal lees, die historiese en literêre konteks verstaan en onderskei tussen wat die skrywer beskryf en wat hy voorskryf.

Dieselfde beginsel geld vir die Bybel.

Die Bybel beskryf inderdaad seksuele immoraliteit, geweld, verkragting, moord, verraad en ander gruwelike optrede. Maar die feit dat die Bybel vertel dat iets gebeur het, beteken nie dat God dit goedkeur nie. Inteendeel, baie van hierdie verhale wys juis die vernietigende gevolge van menslike sonde.

Die Bybel bied nie ’n prentjie van ’n volmaakte mensdom nie. Van Genesis af word die mens se gebrokenheid sigbaar. Adam en Eva se sonde word gevolg deur ’n geskiedenis waarin mense telkens teen God en teen mekaar sondig. Die Bybel probeer nie hierdie werklikheid wegsteek nie. Dit is opvallend eerlik oor die mens se mislukkings.

Maar dit is nie die einde van die verhaal nie.

Deur die Ou Testament heen roep God sy volk telkens tot bekering: Keer terug na My. Die boodskap is nie: “Kyk wat doen mense en volg hulle voorbeeld” nie. Die boodskap is: “Verlaat julle sonde en keer terug na God.”

In die Nuwe Testament word hierdie boodskap in Jesus Christus verdiep. Jesus sê Hy het gekom om sondaars te roep. Die kruis staan sentraal in die Christelike geloof juis omdat die mens se sonde ernstig geneem word, maar God terselfdertyd vergifnis en versoening aanbied.

Daarom moet ’n mens ook versigtig wees met die voorstelling dat God volgens die Bybel bloot ’n kind by ’n ander man se verloofde verwek het. Dit is nie wat die Evangelieverhaal leer nie. Maria was aan Josef verloof, maar die Evangelies beskryf Jesus se ontvangenis as ’n werk van die Heilige Gees, nie as ’n seksuele verhouding tussen God en Maria nie. Om dit anders voor te stel, verander die aard van die verhaal voordat dit gekritiseer word.

Natuurlik mag iemand die Bybel verwerp. Niemand hoef ’n geloof in die Bybel te aanvaar nie. Maar ’n eerlike kritiek behoort eers die boek se boodskap in sy geheel te verstaan.