‘Bevorder die belange van die stad’

“Wat sal gebeur as ons God toelaat om deur ons te werk waar ons is?”

Dié vraag is Donderdagoggend tydens die dagopening deur ds Maartje van der Westhuizen, predikant van Elarduspark in Pretoria, aan die Algemene Sinode van die NG Kerk gevra.

Ds Maartje van der Westhuizen

Van der Westhuizen het na aanleiding van Jesaja 29:4-14 gepraat. Die agtergrond van dié teks is dat Jerusalem en die tempel verwoes is. Die elite van die volk is as ballinge na Babilon weggevoer. Hulle wil nie daar wees nie. Hulle twyfel oor baie dinge en wonder waar is God. Hulle verlang terug na die verlede of trek terug en probeer net na hulle eie belang omsien.

Teen dié agtergrond kom ’n boodskap van God na hulle. Hulle moet hoor dat hulle nie in hulle leeftyd sal terugkeer na Jerusalem nie. Dit sal eers oor 70 jaar gebeur.

In daardie situasie sê God hulle moet huise bou, tuine aanlê, trou, kinders hê – en die belange van die stad bevorder. Hulle moet vir die stad bid, want die stad se belange is ook die ballinge se belange.

En dan hoor hulle die hart van God. Hy beplan vir hulle voorspoed. Hy wil hulle ’n toekoms gee.

Van der Westhuizen het gesê die teks daag die NG Kerk uit om die Here te vra om hulle oë op te maak vir geleenthede om in te bou in die huidige situasie, en dat gelowiges moet bid vir diegene met wie hulle nie klaarkom nie.