Ry jy in Somerset-Oos in die Oos-Kaap in, word jy dalk net welkom geheet met die klanke van liedere soos “Amazing grace” of “I have a dream” wat deur oom Dougie Argyle, koster by die NG gemeente Somerset-Oos, kliphard op die dorp gespeel word. Argyle het net voor Kersfees in 2013 besluit om die gemeente se kerktoring met twee luidsprekers toe te rus en op te dollie om vrolikheid en vreugde in die somber Somerset-Oos te bring.

Argyle, wat al van 1965 af op Somerset-Oos woon, is die laaste jaar en ’n half die koster van Somerset-Oos gemeente, maar omdat hy gereeld in die kerkgebou gaan bid het, het hy ’n sleutel van die gebou en toegang tot die kerktoring gehad. Hy vertel: “In 2013, toe oudpresident Nelson Mandela oorlede is, was daar ’n somber gevoel op die dorp. Boonop is ’n dierbare oom in hierdie tyd op sy plaas vermoor. Die dag voor Kersfees het ek besef ek sal ’n plan moet maak om weer vrolikheid op die dorp te bring. En dít is toe ek besluit om twee groot speakers in die kerktoring te sit en die musiek sommer hard in die dorp te speel!”

Hy vertel dat hy nie toestemming van die kerkraad gevra het nie, maar dat hy dankbaar is dat die dorp steeds na sewe jaar deur die musiek geïnspireer en verenig kan word. “Ek speel ’n verskeidenheid van liedere in Afrikaans, Engels, isiXhosa en selfs Russies. Ek glo in vereniging. As ons een God dien, hoe kan ons verdeel wees?” vra Argyle.