Ter viering van #Aardedag (22 April) het Ockert Smit, eienaar van Chrisma Slaghuis op Rawsonville en lede van sy personeel bome geplant en toebroodjies uitgedeel by Wyzneusies Crèche in Goudiniweg, volgens ’n inskrywing op die onderneming se bedrywige Facebookblad.

LEES OOK: Die boer wat ’n skool gebou het … en ander grondstories

Chrisma Slaghuis en Johette Pople Photography, albei besighede geleë tussen die mooi wingerde en berge van die Boland, het boonop besighede uitgedaag om ook ’n verskil in skole soos hierdie se toekoms te maak deur hulle te ondersteun in hulle behoeftes en die versorging van hulle terrein.

Paul Laverlot is al 50 jaar deel van die slaghuis se span en is ’n oudleerder van hierdie einste skool. “Paul het met trots gesê wat ’n voorreg dit vir hom is om deel te kan wees van die projek en weer terug te kan gee aan sy eie gemeenskap,” luidens die inskrywing.

• Om Wyzneusies Crèche te ondersteun of uit te vind wat hulle benodig, kontak gerus juffrou Bertha Hugo op wyzneusies@breede.co.za