‘Dis anders om digitaal te rou,’ sê leraars

Predikante moes sedert Maart verlede jaar, toe die Covid-19-pandemie verwoesting in Suid-Afrika begin saai het, nie net gewoond raak om digitaal tydens eredienste te bedien nie, maar moes ook hulle nuutgevonde digitale vaardighede gebruik om aanlyn begrafnis te hou.

Behalwe vir praktiese kommer oor of die Wi-Fi sterk genoeg gaan wees om die begrafnisse digitaal uit te saai en of daar skielik beurtkrag ingestel gaan word, sê ds Rudi Swanepoel, predikant by Andrew Murray-gemeente in Johannesburg, dat die hele aard van die rouproses vir families en die hantering daarvan deur predikante verander het.

LEES OOK: Vredendal: Verslaenheid ná Covid dorp tref

“Die hele rouproses is anders tydens digitale begrafnisse,” sê Swanepoel. “Families besef begrafnisse lyk nou anders. Daar is minder fieterjasies. Daar word nou meer op die kern, die persoon wat oorlede is, gefokus. Mense rou anders. Hulle weet die rouproses gaan langer neem. Ek dink die pandemie het ons kom leer dat daar nie iets soos closure bestaan nie. Elke rouproses is uniek,” sê Swanepoel.

Ds De la Harpe le Roux van die Tweetoringkerk in Bloemfontein beaam dit en sê hy mis dit om ordentlik saam met die familie van die afgestorwene te sit en rustig oor alles wat hulle tydens die begrafnis beleef het, te praat. “Dis moeilik om digitaal met die familie tydens hulle rouproses, wat lank na die begrafnis voortduur, te gesels. ’n Mens probeer maar met WhatsApp en oproepe, maar dis totaal onbevredigend,” sê Le Roux.

LEES OOK: Verwerk die ‘voortslepende Covid-trauma’ só

Die digitale rouproses is egter nie net tans uitdagend vir die families wat die predikante tydens begrafnisse moet begelei nie, maar het ook ’n invloed op die emosionele welstand van die predikante sélf. Dr Marina Strydom, leraar by NG gemeente Ooskerk in Pretoria, vertel sy het onlangs spottenderwys na die uitdagings wat die Covid-19-pandemie vir leraars inhou verwys en gesê dat dominees ná die pandemie mental health holidays gaan nodig hê. Minwetend dat sy tydens die derde vlaag van die Covid-pandemie, wat Gauteng tans oorweldig, sal besef hóé waar die woorde eintlik is.

Swanepoel stem saam. Hy vertel dat die meeste predikante in Gauteng, waarvan hy weet, deur uiters moeilike tye gaan. “Dis ’n worsteltyd. Die meeste predikante word tans gerek soos ’n rekkie wat ’n mens verder en verder uitrek en ’n mens weet nie wanneer dit gaan snap nie,” verduidelik Swanepoel.

Word 'n vriend van Kerkbode