Johan van Noordwes skryf: Die Bybel is vol metafore oor skape en herders. Jesus is die goeie Herder, ons is sy skape. Die fliek American Sniper het ’n aanhaling oor skape wat my bygebly het: “Daar is drie tipes mense in hierdie wêreld: skape, skaaphonde en wolwe.” Ek hou van die analogie en die Bybel verwys ook na wolwe wat die skape kom verslind. Johannes Calvyn het gesê dat ’n hond blaf wanneer sy baas aangeval word, en hy (Calvyn) sal ’n lafaard wees indien hy stilbly wanneer God se waarheid aangeval word. God se waarheid is deesdae konstant onder die vergrootglas.

Ek lys hieronder ’n paar voorbeelde van wat Jesus (J) sê en wat ander sê (AS):

J: “Ons Vader wat in die hemel is.”

AS: God is ’n Vader of ’n Moeder, net soos jy wil.

J: “Van binne af, uit die hart van die mens, kom die slegte gedagtes: onkuisheid …” (“Porneia”: enige seksuele verhouding buite dié van ’n getroude man en vrou).

AS: Diegene wat hulle weg oopsien om selfdegeslagverbintenisse te bevestig, is welkom om dit te doen en daar behoort ’n formulier daarvoor te wees.

J: “Het julle nie gelees dat die Skepper hulle van die begin af man en vrou gemaak het nie.”

AS: Die Bybel misluk as ’n handboek oor geslagsake.

Hierdie is maar enkele voorbeelde van wat bespreek word, maar tans hoor ’n mens net enkele skaaphonde blaf. Is dit moontlik dat die skaaphonde só min is?