Die teoloog en skrywer Christina Landman het vandeesweek tydens ’n geleentheid by die Universiteit van Pretoria (UP) ’n eredoktorsgraad ter erkenning van haar omvangryke akademiese loopbaan ontvang, terwyl die kanseliersmedalje aan die joernalis Neels Jackson toegeken is vir sy bydrae tot kerkjoernalistiek.

Jackson, ook ’n voormalige redakteur van Kerkbode, het vir meer as 23 jaar by Beeld gewerk en vir die meeste van sy loopbaan oor kerksake berig. Jackson, ’n alumnus van dié universiteit, is afgetree maar skryf nog gereeld op vryskutbasis oor veral die NG Kerk. Hy het ook verskeie boeke geskryf, waaronder Drie dekades van verandering – Die NG Kerk se pad na verruiming.

Landman is eweneens ’n produktiewe skrywer en rubriekskrywer en het in 2023 ’n outobiografie by Lux Verbi gepubliseer. Laasgenoemde is “die pakkende verhaal van ’n dominee, dosent, ma, navorser, narratiewe terapeut, rubriekskrywer, historikus van mondelingse oorvertellings … Iemand wat deur haar lewe, soos die digter Rainer Maria Rilke ons almal aanmoedig, haar vrae gelééf het en nou haar insigte met vernuf en waagmoed deel,” het Kerkbode in ’n resensie geskryf.

Lees meer oor dié universiteit se gradeplegtigheid: UP helps almost half of autumn graduates to achieve their academic dreams

Uit die argief: Hieronder is ’n onderhoud met Neels Jackson toe hy in 2019 die leisels by Kerkbode aan sy opvolger oorgegee het.