“Gebed bind mense nog altyd saam – oor grense, generasies en tye heen. Ons aanlyn gebedsmuur is ’n digitale herinnering hieraan,” sê dr Nico Simpson, hoof van die Christelike uitgewer, Bybel-Media (BM).
Besoek ook: Gebedskers
Hy verwys na Gebedskerse, ’n virtuele gebedsmuur op BM se gewilde platform, Boodskap vir Vandag. Dit is ’n nuwe digitale funksie wat ’n digitale kapel wil bied waar mense ’n oomblik kan neem om stil te word, ’n gebed in hulle eie woorde te skep en, as hulle wil, ander te nooi om saam met hulle te bid.
Vir elke gebed op die blad is daar ’n flikkerende kersie.
So werk dit : Besoek Gebedskersblad
- Raak stil
Raak vir ’n oomblik stil en dink rustig na waarvoor jy wil bid. Herinner jouself aan God se beloftes in die Woord.
- Steek ’n gebedskers aan
Vul die aanlyn vorm in. Die idee is dat hierdie eenvoudige aksie ’n heilige ruimte in jou dag skep – ’n oomblik van stilword en gebed. Skryf dan ’n kort gebed vir jouself, vir iemand na aan jou of vir gebeure in die wêreld. Jou kers word ’n sigbare teken van jou gebed.
- Deel jou gebed (indien jy wil)
As jy verkies, kan ander jou kers sien en saam met jou bid. Jy is nie alleen nie. Elke liggie verteenwoordig ’n hart wat na God uitreik. Jou kers sal vir ’n tyd op die muur bly brand en ’n flikkerende simbool van hoop en geloof wees.
“Elke kersie op ons aanlyn gebedsmuur is ’n getuienis van hoop—’n teken dat geloof leef, selfs in die donkerste oomblikke. Dis hoe ons mekaar ondersteun op die Jesus-weg,” voeg Simpson by.
- Kerkbode is ’n publikasie van Bybel-Media.
- Ondersteun