Dr Nioma Venter skryf: Meer as twintig jaar het verloop sedert die laaste geleentheid waar leraars uit die hele NG Kerk as kollegas kon saamkom. Daarom is die PredikanteSAAMkoms wat in Augustus vanjaar by Goudini naby Rawsonville plaasvind, in baie opsigte ’n unieke geleentheid. Terwyl baie leraars die uitnodiging aangegryp het, is daar ook eerlike vrae oor die wenslikheid van so onderneming.

LEES OOK | Brief: Waarom ek nie die predikantebyeenkoms gaan bywoon nie

Die bedoeling van die PredikanteSAAMkoms is om by die versorging, bemoediging en toerusting van predikante uit te kom. Die beginsel van “care for the carers” is nie vreemd in enige beroep waar mense voortdurend met die nood, pyn en uitdagings van ander werk nie. Navorsing wat in 2025 deur die Algemene Taakspan Navorsing gedoen is, het duidelik gewys dat die welwese van baie predikante onder druk is. Dit is verstaanbaar. Daaglikse blootstelling aan verlies, trauma, onsekerheid, konflik en die uitdagings van gemeenskappe laat sy merk. Dominees is ook net gewone mense; hulle voel die pyn van ander en dra saam aan die emosionele las daarvan. In sulke omstandighede is die verskynsel van compassion fatigue nie onbekend nie. Om na predikante om te sien, is nie bloot ’n belegging in dominees nie; dit is uiteindelik ook ’n geskenk van die kerkverband aan die welwese van gemeentes en die mense wat hulle dien.

Die PredikanteSAAMkoms het ook geestelike verdieping en hernuwing ten doel. Die SAAMkoms is nie bedoel as ’n vakansie of ontspanningsgeleentheid nie, maar as ’n ruimte waar predikante saam kan aanbid, die Woord bestudeer, oor hul roeping besin en opnuut bemoedig word vir die bediening. Tyd saam met die Here, deur middel van ’n verskeidenheid temas, gesprekke en aktiwiteite, verkwik die siel. Dit is ook ’n geleentheid om herinner te word aan die voorreg om steeds in Sy diens te mag staan. Waar baie leraars groot verantwoordelikhede dra en dikwels in uitdagende omstandighede werk, is sulke tye van afsondering en hernuwing nie vanselfsprekend nie.

LEES OOK | Brief: Hoekom ek wel die SAAMkoms gaan bywoon

Die waarde van ontmoeting moet nie onderskat word nie. Die kerk is meer as strukture, besluite en vergaderings. Kollegas wat mekaar selde sien, kry die geleentheid om verhoudings te bou en netwerke te versterk. Sulke ontmoetings dra dikwels by tot groter begrip, vertroue en verbondenheid. In ’n kerkverband wat oor groot geografiese afstande versprei is, is dit nie ’n geringe saak nie. 

Daar is ook die vraag oor die koste. Die ondersteuning van hierdie geleentheid staan nie teenoor hulp aan noodlydendes nie. Die kerk het die afgelope tyd op verskeie maniere daadwerklik by noodverligting, rampverligting en gemeenskapsontwikkeling betrokke gebly. Om mense in nood te help en om na leraars om te sien, is nie wedersyds uitsluitende keuses nie. Die een hoef nie ten koste van die ander te gebeur nie.

Miskien is die sterkste aanduiding van die behoefte aan so ’n geleentheid die feit dat die 650 beskikbare plekke binne enkele weke opgeneem is en die byeenkoms tot maksimum vol is. Verder het ongeveer 120 leraars ingestem om temas te lei – in daardie opsig is dit ‘n byeenkoms vir dominees deur dominees. 

Dit wys dat die behoefte aan ontmoeting en versterking werklik is. Daarom is die gebed vir die SAAMkoms eenvoudig: dat die Here Sy kerk sal versorg deur dié te versorg wat geroep is om Sy kerk te dien, en dat alles uiteindelik tot Sy eer en die uitbreiding van Sy koninkryk sal wees. Brief verkort – Red. 

Dr Venter is die algemene sekretaris van die NG Kerk.