Fred Mouton het Grootseunbriewe lewe gegee

Die geliefde illustreerder en spotprenttekenaar Fred Mouton is Woensdag op 74 jaar aan kanker oorlede. LiG-redakteur Francine Prins onthou hom vir sy buitengewone talent en deernis.

Fred Mouton was enig in sy soort. Sy vaardigheid as illustreerder was buitengewoon. Sy fyn aanvoeling vir die essensie van ’n storie, en sy fantastiese humorsin is in die lyne van sy prentjies vasgevang.

Fred het van Junie 2000 die illustrasies vir die Grootseunbriewe in LiG, Kerkbode se susterpublikasie, geteken. Dis meer as 250 illustrasies. Daarby het hy ook die ses bundels wat van dié stories verskyn het, geïllustreer. Die skrywer van die Grootseunbriewe, Barend Vos sê: “Hy het my woorde lewe gegee, eintlik ’n gesig – hande vol gesigte.”

Francine Prins, redakteur van LiG onthou veral sy medemenslikheid: “’n Keer voordat ek met kraamverlof gegaan het, het Fred se Grootseun-illustrasie in ’n bruin koevert op my tafel beland. Agterop die koevert was ’n klein illustrasie van ‘n baba met ’n groot fopspeen. Dit was só spesiaal en deernisvol.”

  • Die Christelike tydskrif LiG is ’n susterpublikasie van Kerkbode.
Word 'n vriend van Kerkbode