Die Fellowship of Christian Councils in Southern Africa (FOCCISA) het onlangs ‘n beroep op die Afrika-unie en die presidente van die Demokratiese Republiek van die Kongo (DRK), Rwanda en Suid-Afrika gedoen vir optrede om die toenemende geweld in die ooste van die DRK te stop. Die onlangse oplewing in gevegte, veral in Goma, het gelei tot wydverspreide burgerlike lyding en die tragiese dood van lede van vredesmagte.

In hulle appèl, gemaak op 7 Februarie, word verwys na die M23-rebellegroep se oorname van die Kongolese stad, Goma, en die verwoesting wat dit veroorsaak het, ingesluit sterftes, seksuele geweld en mediese fasiliteite wat oorweldig is. In hul verklaring (sien onder) het FOCCISA hierdie menseregteskendings ten sterkste veroordeel en gevra vir ’n dringende wapenstilstand.

Die organisasie sê hulle is hartseer dat lede van vredesmagte hulle lewens verloor het. Uit Suid-Afrika was daar 14 soldate wat gesterf het terwyl drie Malawiërs en een soldaat van Uruguay se vredesmag ook hul lewens verloor het. FOCCISA het gesê hulle eer hierdie soldate se opoffering en het gevra vir hernieude diplomatieke pogings om stabiliteit te herstel.