Die Sinode van Oos-Kaapland vra vir bydraes om veral boere in hulle gemeenskappe te help wat erge skade gely het tydens onlangse brande te midde van ’n ontluikende droogte.

“Ons sien en ons hoor die stories van boere wat op hierdie oomblik besig is om moed te verloor en ons weet ook dat dit aan die hart ook raak …,” sê Joe Janse van Rensburg van die Oos-Kaaplandse Rampnetwerk, ’n NG Kerk-inisiatief wat laasjaar gestig is. Hulle het ook ’n rampfonds begin.

“Ons besef nie aldag wat ons boere deurgemaak het die laaste tyd nie sowel as die brandbestryders, almal wat betrokke is …,” voeg hierdie gemeentepredikant van die NG Gemeente Jeffreysbaai by in ’n onlangse video (bo) waarin hy meer verduidelik oor die skade gely, hoe gelowiges dit beleef en die rede vir die fonds.

Die fondse word in vennootskap met plaaslike gemeentes versprei via “landbouverenigings, betroubare nie-regeringsorganisasies en ander instansies met ‘n bewese rekord van dienslewering”, het Grens.Pos-nuusbrief van 23 Januarie 2026 berig.

Dele van die Oos-Kaap is in Januarie tot rampgebied verklaar ondermeer Nelson Mandelabaai, Port Alfred, Humansdorp, Jeffreysbaai en dele in die Langkloof.

Lees ook: Nuwe netwerk spring aan die werk ná dit sous en verspoel