Emeritus-aartsbiskop Desmond Tutu se dogter het as priester bedank omdat die Suid-Afrikaanse Anglikaanse Kerk nie haar onlangse huwelik met ’n vrou wou erken nie. Eerw Mpho Tutu-Van Furth en haar huweliksmaat, Merceline, is tans op wittebrood in Bali. Mpho het gesê biskop Raphael Hess van die bisdom van Saldanhabaai is opdrag gegee om haar lisensie terug te trek. “Ek het besluit ek sal dit liewers vir hom gee eerder as dat hy dit net vat, dit is ’n bietjie waar-diger,” sê Mpho.

Soos in Afrikaanse kerke heers daar ’n groot debat oor selfdegeslaghuwelike in die Anglikaanse Kerk. Die aartsbiskop van Kaapstad, Thabo Makgoba, het kort ná Mpho se troue gesê die riglyne vir gayhuwelike sal in September heroorweeg word. Emeritus-aartsbiskop Desmond Tutu het hierdie week gesê Makgoba het hom toestemming gegee om as pa sy dogter se huwelik te seën. “Ons het gehoop dit sou nie verkeerd geïnterpreteer word as dat ons die besluite van die sinode wou vooruitloop nie, ” het hy gesê.

Volgens Mpho het sy steeds ’n goeie verstandhouding met die Episkopaalse Kerk in Amerika, susterkerk van die Anglikaanse Kerk, waar selfdegeslaghuwelike erken word. – Rapport, 22 Mei 2016