JC Vermaak, lidmaat van die NG gemeente Meyerspark, het op 23 April 2019 hierdie pragtige foto geneem van die westeson wat die kerkto­ring verlig en ’n dubbele reënboog wat die kerkgebou omring, laat weet Hermien Liebenberg, vrou van die gemeente se leraar Isak Liebenberg. Die gemeente vier op 29 Mei sy 60ste verjaarsdag, maar die kerkgebou is sowat drie jaar jonger – dit is in November 1962 ingewy. Die waaiertipe-kerkgebou is deur die firma Hartman en Van der Walt ontwerp en gebou teen ’n koste van sowat R35 000. Die kerkklok in die toring lui nog elke Sondag en word nou getrek met ’n tou wat op Kinibaai in die Oos-Kaap opgetel is. Die gemeente spog met ’n paar lidmate wat al 60 jaar deel van die gemeente is. Een van hulle, Nils Anderson, wat op 4 Mei vanjaar 89 jaar oud word, het ook op die eerste kerkraad gedien.

Stuur ’n pragtige foto van jou kerkgebou aan conette@tydskrifte.co.za en ’n paar interessante feite sodat ons dit vir ander Kerkbode-lesers kan wys.