Humansdorp: ‘Dis meer as net muffins – ons bou brûe’

’n Ongewone “kommissie” is onlangs deur die kerkraad van die NG gemeente Humansdorp in die Oos-Kaap gevorm. Die Muffinkommissie se doel is om liefde deur dade te bewys uit dank aan die Here nadat hulle gemeente onlangs 170 jaar oud geword het, het Bessie Langenhoven, ’n lidmaat by die gemeente, laat weet.

So is 3000 muffins op 23 Augustus aan petroljoggies, werknemers en pasiënte by hospitale, klinieke, die landdroskantoor, polisiekantoor en persone by taxi-staanplekke op die dorp uitgedeel. Motorwagte, bejaardes, en straatlopers is ook bederf.

Die entoesiastiese plaasskoolspannetjie kom by die kerksaal aan met die leë mandjie nadat hulle mense van Jesus vertel het en boonop iets lekker kon gee.

“Elke muffin is sorgvuldig in ’n plastieksakkie gesit, met ’n mooi kleurvolle lintjie toegebind en afgerond met ’n kaartjie daaraan vasgekram met die woorde: ‘Jesus is lief vir jou!’ in Afrikaans, Engels en Xhosa daarop gedruk,” sê Bessie.

Muffinmengsels is glo teen ’n spesiale prys bekom en aan almal – selfs lidmate van ander kerke – wat bereid was om te bak uitgedeel.

Bessie vertel die uitdelers van die muffins was ook ’n diverse klomp mense. Van die “20-Somethings” tot leerders van ’n plaaslike plaasskooltjie.

“Dit was ’n wonderlike ervaring vir almal, maar seker veral vir die uitdelers – om die vreugde, verbasing, ongeloof en blydskap te ervaar van mense wat dit nie altyd maklik het nie, omdat hulle iets lekkers en ’n wonderlike boodskap daarmee saam kon ontvang, sonder om daarvoor te vra of dit te verdien. Party ouens was skoon in trane. Daar is vir seker heelwat brûe op hierdie dag gebou, maar bowenal glo ons, is ons Here verheerlik,” sê Bessie.