’n Veilige ruimte vir omgee en deel vorm ’n basiese behoefte vir enige klein­groep. Wees toegerus en voorbereid deur seker te maak die basiese dinge is alles in plek, het VrydagNuus, amptelike nuusbrief van die Wes-Kaapse Sinode, berig.

Hier gee ds Anriëtte de Ridder, PSD vir Jeug- en Familiebediening van dié sinode, idees vir jou kategese-toolboks:

1. Jy het die erediens bygewoon en self tyd gemaak vir God hierdie week.
2. Jy het jou groepie na kategese genooi via WhatsApp.
3. Jy’s voorbereid – jy ken die inhoud van die les en het self daaroor stiltetyd gedoen.
4. Jy het skryfgoed, plakkers, Bybels, jou boek en benodigdhede vir die ontmoeting ingepak.
5. Jy is gefokus op die kinders/tieners se welstand en jy is aanpasbaar.
6. Jy weet wie opgedaag het en volg kinders/tieners persoonlik op wat nie gekom het nie.
7. Jy vra oop vrae, gebruik aktiwiteite en skep ’n ontspanne ruimte vir ge­loofsgroei.
8. Jy het iets interessant wat die ontmoeting opkikker, hetsy ’n speletjie, hulpmiddel, craft, lied, videogreep of simbool.
9. Na elke ontmoeting los jy jou groe­pie met ’n uitdaging vir die week en jy kry die volgende Sondag terug­voering daaroor.
10. Daar is elke week tyd vir gebed – jy hou ’n gebedslysie by en vra vir terug­voering. Jy wissel die manier af waarop daar gebid word.