Skrywer herinner dat God ‘aan die ander kant van woorde’ is

Floreer deur Marina Strydom

Uitgewer: Enroute Publiseerders, 2021

Resensent: Rethie van Niekerk

Verruklik. Dit is die beste woord waarmee ’n mens hierdie refleksies van Marina Strydom kan beskryf. Ander woorde wat by ’n mens opkom, is stylvol, sag, eerlik, realisties, deernisvol, uitsonderlik. Ons trek in Maart van 2022, maar hierdie is reeds my gunsteling-boek van die jaar.

Sedert die begin van inperking in 2020 het Strydom daaglikse refleksies geskryf, wat in hierdie bundel met 70 skrywes saamgevat is. Elke skrywe getuig van diepe insig en wysheid.

Terwyl jy lees, voel die skrywer soos jou persoonlike geestelike begeleier. Sonder enige geestelike clichés word daar rustig en sag met die realiteite van die lewe gewerk. Op geen oomblik draai die skrywer haar rug op die vrae of worstelinge van die lewe nie. Nêrens is sy voorskriftelik nie. Met deernis word misterie omarm en die leser op ’n reis van geestelike verdieping geneem. Al is dit baie prakties, is hierdie geensins ’n selfhelpboek met ’n maklike “to-do” lysie nie.

’n Mens wil stadig lees, rustig saam met die skrywer in ’n dieper geloofslewe insak. Die boek is soos die lapidarie waarvan die skrywer vertel – die kuns van edelstene slyp. Tussen treffende metafore, poësie, pragtige woorde en inspirerende gedagtes, word die leser ook herinner dat God “aan die ander kant van woorde” is.

Floreer verdien ’n baie wye lesersmark.

Bestel teen R150 by Palet.

Ds Rethie van Niekerk is predikant by Blouwaterbaai Familiekerk in Gqeberha.

Word 'n vriend van Kerkbode