Hermeneutics and social transformation – A selection of the essays of Bernard C Lategan

Redakteurs: Dirk J Smit en Len Hansen

Uitgewer: SUN Media, 2015

Resensent: Nina Müller van Velden

“I would like to warn you beforehand: your views will be challenged by this course, and you will meet ideas that sound very strange at first – but which will develop an insight and a skill which will serve you, actually, the rest of your life.” Aldus professor Lategan in die eerste video-opname van die gratis kursus Introduction to hermeneutics, terwyl sy mondhoeke effens lig en ’n glinster in die oog verklap dat hy nou uit ervaring praat.

Die voortdurende proses van waarneming, interpretasie en respons – die boustene van hermeneutiek – “is as natural and as unconscious as breathing”. Lategan meen dat ons dit nodig het om sin te maak uit die lewe. Hierdie voortgaande lewende proses kan uiteindelik, met onderskeiding, op wysheid uitloop. Interpretasie is nie onskuldig nie, ook nie die interpretasie van Bybelse tekste nie. ’n Mens kom diep onder die indruk van die verantwoordelikheid wat ons het wanneer ons interpreteer, juis ook as gelowiges wat erns maak met die tekste van die Bybel en die kontekste waarbinne ons onsself bevind.

Alhoewel die e-boek ’n akademiese publikasie is, is die styl van die videokursus toeganklik. Gevolglik kan nuuskieriges gemaklik hulle leer-hoedjies opsit. Met twee inleidende video’s, gevolg deur twaalf langer videosessies, bied Lategan self in hierdie kursus op ’n toeganklike en bevatlike manier die boustene van hermeneutiek aan, met ’n toespitsing op Bybelse hermeneutiek.

Gegewe die voortdurende gesprekke oor Bybelinterpretasie en hermeneutiek in verskeie ruimtes in die kerk, kan hierdie videokursus en e-boek ’n waardevolle bydrae lewer tot taal sowel as begrip vir die komplekse, dog opwindende moontlikhede wat die interpretasie van tekste inhou.

Die e-boek is gratis beskikbaar by African Sun Media.

Dr Nina Müller van Velden is ’n postdoktorale navorsingsgenoot in Nuwe Testament aan die Fakulteit Teologie, Stellenbosch, en tentmakerleraar by NG Kerk Parke-gemeente.