Jan Abraham du Rand is op 3 Augustus 1945 gebore in Pretoria en bring die  eerste sewe jare van sy lewe deur op Upington, waar sy vader as siviele ingenieur  werk. Jannie en Marie du Rand met  hulle twee kinders Jan en Dorothea,  woon op ’n kleinhoewe waar hulle  liefde vir diere en die grond gevestig  word. Jan beleef aan sy eie lyf wat  gehoorsaamheid aan die Here beteken,  toe hulle na Pretoria verhuis omdat sy vader geroepe voel om predikant te  word en deeltyds studeer. Later word  ds JA du Rand op veertigjarige leeftyd predikant van die NG Gemeente Villieria in Pretoria. Die jong Jan du Rand  begin in 1952 met sy skoolloopbaan  aan die Laerskool Generaal Jacques  Pienaar, waar hy ook hoofseun is. Hy word geïnspireer deur mnr Combrink,  vader van prof Bernard Combrink.  Hy is later leerling aan die Hoërskool  Wonderboom, waar hy in 1963 met vyf onderskeidings matrikuleer. Hy wou  chemiese ingenieur word, maar na ’n  ernstige motorongeluk aan die einde van standerd agt, besluit hy finaal om in die voetspore van sy vader te volg  en predikant te word.

Jan studeer aan die Universiteit van  Pretoria, waar hy die BA en Honneurs  in Grieks verwerf. Hy is student aan die  Fakulteit Teologie (Afd B), verwerf die  BD-graad en is voorsitter van die teologiese vereniging Deo Gloria. Hy word  aan die einde van 1970 as proponent van die NG Kerk gelegitimeer. As leier van ’n ASB-toer, ontmoet hy Anneli van der Walt, ’n plaasmeisie van die  Springbokvlakte, met wie hy in 1971 trou. Hy behaal tegelyk die MA-graad in Grieks en die DD-graad in Nuwe Testament en is prediker in die NG Gemeente Kinross. Op 20 Januarie 1973 word hy met handoplegging bevestig in die NG  Gemeente Krokodilrivier op Brits, waar  hy predikant is tot met sy vertrek na die akademiese wêreld.

In 1976 word hy dosent aan Tukkies se Fakulteit Teologie, waar hy  Bybelkunde doseer. Dit is ’n verrykende en vormende ervaring as jong  akademikus en in 1977 behaal hy  sy doktoraat met die proefskrif: “Entolé in die Johannese Evangelie en -briewe”. Hy het toe  reeds ’n Johannese antenna ontwikkel wat hy met oorgawe kon hanteer. ’n Skerp draai kom op sy pad toe dr Jan en Anneli du Rand met hulle drie dogters,  Ingri, Mari en Janet, na Bloemfontein verhuis waar hy in 1980 hoof word van die Departement Nuwe Testament aan die nuutgestigte Fakulteit Teologie aan die Universiteit van die Oranje Vrystaat. Op ’n besondere wyse word  die grondslag gelê deur professore Mias  de Klerk, Evert Kleynhans, Koos Smit,  Mauritz Kloppers, Pieter Potgieter en  Jan du Rand. Kovsies het ruim geleentheid vir prof Jan geskep om nasionaal  en internasionaal met sy Johannese navorsing voort te gaan, onder andere  deur beurse vir oorsese studiebesoeke.  Die vestiging en uitbou van ’n nuwe teologiese biblioteek is aan prof Jan  toevertrou. Die kerklike betrokkenheid van die fakulteit het aan die akademie ’n eie waarde en gerigtheid gegee.

In 1989 word prof Jan as professor in Bybelkunde aangestel by die  Randse Afrikaanse Universiteit in die Goudstad. Toe dit later die Universiteit van Johannesburg word, het nuwe  geleenthede gewink, aangesien die  universiteit se nuwe leierskap berekend op navorsing gefokus het. Aan die  einde van 2009 tree prof Jan amptelik  af en word buitengewone professor in  Nuwe Testament aan die Noordwes Universiteit, die Universiteit van Pretoria en die Northpark Theological  Seminary in Chicago. Hy sou einde Mei  2021 finaal aftree by die Noordwes Universiteit. Oor die jare ontvang prof  Jan verskeie toekennings, onder meer  die gesogte Andrew Murray-prys vir  Christelike en teologiese literatuur,  onderskeidelik in 2008 en 2014 vir sy  boeke oor Openbaring en die eindtyd. Hy het in sy leeftyd meer as 30 boeke  geskryf. Sy hoogste prioriteit was in sy eie woorde “om die Woord so suiwer  moontlik aan die woord te stel”. Dit vind gestalte in sy publikasies vir NG  lidmate en gelowiges oor die Evangelie van Johannes en Openbaring. Prof Jan du Rand was ’n veelsydige  mens met vele belangstellings soos  skilder met olieverf, houtbrandwerk, paneelklop, teel van skoubudjies, tennis  en gholf. Hy is ook ’n gesinsman by  uitstek en ondersteun sy vrou Anneli  in haar jarelange kankerstryd. Soos baie ander Suid-Afrikaanse ouerpare,  beleef hulle ook die hartseer dat al drie  hulle dogters oorsee woon en dit nuwe  uitdagings bring.

Ongeveer drie weke voor sy dood  word prof Jan met longprobleme opgeneem en toe hy Covid-19 opdoen,  word sy gesondheid so aangetas dat dit ’n glybaan word wat sy einde verhaas.  Ons groet hierdie briljante teoloog en  geliefde dienskneg van die Here met hartseer, maar met dankbaarheid teenoor die Hemelse Vader dat sy skriftelike nalatenskap ons sal troos. Sy begrafnisdiens vind op  26 Maart 2021 plaas in die NG Gemeente Elarduspark en sy vriende in  Suid-Afrika en oorsee kon die diens op hulle selfone en internet volg. Ons bid die Here se troos toe aan sy vrou Anneli, drie dogters en nege kleinkinders. Met die afsterwe van prof Jan du Rand  op 9 Maart 2021 in die Kloofhospitaal  te Pretoria, beleef die NG Kerk ’n hartseer oomblik. Prof Jan du Rand word onthou as ’n briljante  Nuwe-Testamentikus, deurwinterde  teoloog en ’n gewaardeerde vriend.  Met sy fyn humorsin en spitsvondige  seggingskrag, kon hy ’n situasie reg  opsom en verwoord. Hy was iemand met akademiese integriteit, ’n ondersoekende gees met ’n uitgesproke  Bybelse vertrek- en standpunt. Sy geskrifte is ’n kosbare nalatenskap en  bly ’n geestelike rots waaruit lewende water vloei uit die Nuwe-Testamentiese  skatkamers. Prof Jan du Rand het vroeg  in sy lewe ’n akademiese liefdesverhouding met die Johannese geskrifte aangeknoop, ’n kosbare magnetiese  verbintenis oor vyftig jaar wat hy tot  die einde toe gekoester het. Met sy oorstap na die Hemelstad beleef prof  Jan ’n onbeskryflik-heerlike tasbare  geloofswerklikheid, die omhelsing van  die oorwinningsteken van Openbaring,  soos verwoord in die 2020-Bybelvertaling waaraan hy met vrug meegewerk het.

In ’n WhatsApp-boodskap kort voor sy dood, skryf prof Jan aan ons  klasgroep: “Dankie vir die diepgang  boodskappe. Wat ook vannag vir my wag, julle gebede dra my. Ja, kom ons  haal asem uit die diepgang van sy groot  onverdiende genade. In Hom!!! jdr”.  So eindig ’n merkwaardige lewe wat  getuig van genade. – Dr Gerdrie van  der Merwe VDM