Willem Jacobus Johannes du Plessis  is op 1 Januarie 1932 te Kroonstad gebore. Sy vader is Willem Jacobus  Johannes du Plessis, ’n mynwerker  en deeltydse boer. Sy moeder is Johanna Maria Spangenberg.  Hy begin sy skoolopleiding in 1938 aan die Laerskool Krugersdorp en ook van 1945 tot 1947 aan die Hoërskool  Potgietersrus. Hierna verhuis hulle na  die Wes-Transvaal waar hy in 1949  matrikuleer aan die Hoërskool Lichtenburg. Hy is onderhoofseun van die  skool, is prefek in die koshuis en speel provinsiale skolerugby. Hy neem deel aan konserte, kore en is deel van die  CSV in elke skool waar hy ’n leerling is.

Hy voel geroepe om predikant te word  en begin in 1950 met sy studie aan die  Universiteit van Pretoria waar hy die  BA-graad in 1952 verwerf. Hy speel vir Tukkies se o.19-rugbyspan en  is lid van die universiteit se stoeispan. In  1952 word hy student aan die Fakulteit Teologie (Afd B) aan Tukkies en is in 1954 en 1955 voorsitter van die Deo  Gloria-bestuur. Hy is ’n inwoner van  Sonop-koshuis waar hy die ondervoorsitter van die tehuis se bestuur is en ’n  groot rol vervul in die “nagligte” in 1954  en 1955.

Hy verwerf ook aan Tukkies die BD-graad in Teologie. Prop WJJ du  Plessis word aan die einde van 1956 as  proponent gelegitimeer en is beskikbaar  vir beroeping. Hy word op 2 Maart 1957  in die NG Gemeente  Wonderpoort in Pretoria met handoplegging ontvang en  bevestig. Hy is ook kapelaan van die Wonderboom-kommando. Intussen is hy op 15 September 1956 in  die huwelik bevestig met Johanna Ludick. Uit die huwelik is vyf kinders  gebore, terwyl die egpaar ook ’n huis  van liefde skep vir ’n pleegdogter.

Ds WJJ du Plessis neem in 1958 ’n beroep aan na Turfloop se NGKA gemeente. In 1960 word hy beroep  na die NG Moedergemeente Stilfontein,  waar hy hard werk in die myngemeenskap en met huisbesoek ’n verskil maak.  In 1964 word hy sendeling in Pretoria Noord Wintersveld, met die spesiale  opdrag Evangelisasiesekretaris van die  NGKA. Dit het geweldige uitdagings  gebring, ook die tentveldtogte waar baie mense die Here gevind het. ’n Kerkgebou te Garankua en ’n evangelisasiesentrum “Seboeng” word  ook opgerig. Oral is kerke, pastorieë en  crèches in die sendinggebied opgerig.

Op 30 September 1972 keer hy  terug na die NG Moederkerk as leraar van die NG Gemeente Onderstepoort  in Pretoria-Noord en hy doen ook grensdiens in Kovango en Ovambo in  die operasionele gebied. Na vyf jaar  loop sy pad op 7 Oktober 1978 na die NG Gemeente Rietkuil, waar hy die plaasgemeenskap en inwoners van  die nabygeleë kragstasie met raad en  daad bedien en so geestelike groei in  die gemeente bevorder.

Op 19 Februarie 1982 word hy leraar  van die NG Gemeente Kemptonpark Noord, waar hy met oorgawe werk tot  met die aanvaarding van sy emeritaat  op 10 Oktober 1988 weens swak gesondheid. Na sy aftrede gaan woon die egpaar in 1989 in Rooihuiskraal  en van 1990 tot 1994 te Amandasig in  Pretoria-Noord. Na 1994 verhuis hulle na die Strand. Intussen hou hy hom  besig met houtsneewerk, speel rolbal  en stap langs die see. Hy preek wanneer  daar ’n geleentheid is en hy dien ook op  die kerkraad. Hierdie dienskneg van die  Koning sterf op 20 Augustus 2020. – Dr  Gerdrie van der Merwe VDM