Die bekende anti-apartheidsteoloog en skrywer, prof Adrio König, is Woensdag in die ouderdom van 86 oorlede.

Die nuus is deur dr Gustav Claassen, algemene sekretaris van die NG Kerk, aan Kerkbode bevestig.

König was sedert 1975 professor in Sistematiese Teologie by Unisa. Gedurende die 1980’s was hy “ook ’n stigterslid van Reforum, ’n inisieerder van die bekende Ope Brief aan die NG Kerk (1982) – waarin ernstige kritiek teen die destydse apartheidsbeleid in kerk en staat uitgespreek is,” volgens die elektroniese Christelike Kernensiklopedie.

Hy was ook ’n begaafde skrywer en is bekend vir verskeie boeke waarvan hy skrywer of redakteur was. Van sy bekendste werke sluit in Kyk, Ek kom gou! (1974), Hier is Ek! Gelowig nagedink oor God (1) en Jesus die Laaste: Gelowig nagedink oor die Einde (2) (1975), God, waarom lyk die wêreld so?, Die helfte is my nooit oor Jesus vertel nie, Fokus op 300 geloofsvrae, en Die groot geloofskommentaar sowel as Paulus, Geloofskatte uit Psalms en Geloofskatte uit die Evangelies.

• Hou Kerkbode dop vir meer beriggewing hieroor.