Op Sondag 19 Februarie het Pieter Nel sy intreepreek gelewer en is as predikant by die verenigde NG en VG gemeente van Bredasdorp in die Overberg bevestig. Sy ma, Jampie, was die eerste vrou in die NG Kerk wat deur haar man bevestig is en Pieter is die eerste proponent wat deur sy ma bevestig is, berig Kaapkerk.co.za.

Pieter se twee kollegas ds. Braam Coetzee en ds. Karlie Liebenberg was saam met sy ma betrokke en deel van sy bevestiging. Hulle het die verskillende take van die amp van ‘n leraar op ‘n praktiese wyse aan hom voorgehou.

Voor die handoplegging het Pieter se twee kollegas vir hom ‘n voorskoot aangetrek, terwyl hulle self ook hulle voorskote aangetrek het. Hierdie moment het bevestig dat hulle as geestelike leiers van die gemeentes en die gemeenskap hulle taak en roeping as “dienskneg” en “dienaars” verstaan.

In Liebenberg se woorde: “Ons wil ons hande vuil maak…ons droom is om diensbaar te wees.” 

Pieter is die derde geslag predikant in sy familie. Sy oupa Sollie Strydom was ‘n predikant en sy pa is prof. Marius J. Nel (dosent in Nuwe Testament by Universiteit Stellenbosch) en sy ma, ds. Jampie Nel, is dominee by NG Oostersee in Parow. Sy oom, Pieter Nel, is ook gelegitimeer as diensleraar in die NG Kerk.

Mag, nie net Bredasdorp ontvangers wees van hulle geestelike leiers se diensbaarheid nie, maar alle gemeentes ervaar dat die amp van die leraar nie gestempel word deur ‘n titel of ‘n toga nie, maar deur ‘n voorskoot.

• Bron: Kaapkerk.co.za
• Het jy nuus? Kontak ons gerus per Whatsapp by 072 149 1969 of e-pos: kerkbode@tydskrifte.co.za.
• Hierdie artikel is ’n mediavrystelling of storie wat aan Kerkbode gestuur is. Dit is geredigeer vir lengte, maar basies gepubliseer soos dit ontvang is.