Piet Niemand van Klerksdorp skryf: Dit word geglo dat Klerksdorp-Oos-gemeente ’n storie van geloof, hoop en liefde het wat u kan opvolg.

Die kerkraad het aan die begin van 2022 besluit om vir dr WJ Schoeman uit te nooi vir ’n preekbeurt en onderhoud met die oog op beroeping. Die besluit is geneem met volle kennis van die persoonlike omstandighede van mevrou Lorinda Schoeman. Sy het as tiener heeltemal doof geword. Dit kon reggestel word met inplantings. Op 21-jarige leeftyd het sy totaal blind geword. Sy is redelik onafhanklik maar het tog begeleiding nodig.

Met volle wete van die probleem het die kerkraad besluit om dr Schoeman as enigste gemeenteleraar te beroep. Hy het op 1 Julie 2022 diens aanvaar.

Soos in enige gemeente moes die leraarspaar hulle voete vind wat in dié geval ekstra moeilik was omdat die pastorie ’n dubbelverdiepinghuis is. Nogtans het Lorinda betrokke geraak in die gemeente. Sy het die vrouelidmate georganiseer in ’n vrouevereniging “Voetspore van Hoop”. Sy is betrokke by alle werksaamhede van die vereniging asook hulle projekte. Sy was ’n gewilde motiveringspreker in Klerksdorp voordat sy swanger geraak het. Hulle babadogtertjie Mia is op 20 September 2023 gebore. Ons as gemeente weet dat daar baie uitdagings vir die pastoriepaar voorlê maar glo dat die Gees van God hulle sal lei.

U kan ’n volledige storie van hulle kry wat die gemeente se leefwyse “Ons is God se goeie nuus” weerspieël.

Hulle kan gekontak word vir volledige inligting by: Dr WJ Schoeman, e-pos: wjschoeman@gmail.com en mevrou Lorinda Schoeman, e-pos: lorindadiedericks@gmail.com