Listen up! The assembly book every teacher needs deur verskeie skrywers

Uitgewer: LAPA, 2024

Resensent: Ghisnene Müller

Listen up! is ’n onmisbare hulpbron vir onderwysers, predikante en ouers wat streef na effektiewe kommunikasie met die jeug. Saamgestel deur meer as 70 bydraers, bied hierdie boek ’n vars en praktiese benadering tot betekenisvolle interaksie met leerders.

Die boek is intelligent gestruktureer in vier afdelings, gefokus op laerskole, intermediêr (laat laerskool en vroeg hoërskool), hoërskool, asook die personeelkamer. Hierdie indeling verseker relevansie vir elke fase van ’n leerder se skolastiese reis en vir opvoeders self. Die oordenkings in die boek is in Afrikaans en Engels.

Ek het as predikant die boek oor maande getoets met saalopeninge en dit uiters bruikbaar gevind. Die inhoud is prakties, relevant en gekoppel aan beide die kerk- en skoolkalender, wat dit besonder waardevol maak vir saalopening en ander skoolgebeurtenisse.

Listen up! maak die intimiderende taak van saalopening meer hanteerbaar, met praktiese riglyne vir effektiewe kommunikasie met jongmense. Die diversiteit van bydraers verseker ’n ryke verskeidenheid perspektiewe.

Hierdie boek is ’n moet vir elke onderwyser en predikant wat by skole betrokke is. Dit bied vars insigte en praktiese hulp in ’n era waar betekenisvolle kommunikasie met die jeug uitdagend kan wees. Listen up! is meer as ’n boek – dit is ’n onontbeerlike metgesel vir almal wat daarna streef om werklik gehoor te word deur die jonger generasie.

Beskikbaar by LAPA.

Ds Ghisnene Müller is predikant by Verwoerdpark in Alberton.