Marita van Leeuwen van George skryf:

Ek skryf in reaksie op die brief (“Dit gaan oor mag“) van Quintus Smit.

Hy skryf dat temas soos die gay kwessie ens nie te doen het met teologiese argumente oor fundamentele kerklike leerstellings nie, maar dat dit eerder gaan oor on-mag en die oorgeërfde kultuur gebou op ‘n paternalisties oordrewe Calvinisme.

Dit is eenvoudig nie die waarheid nie. In my gemeente was daar juis van die ouer geslag mense wat gelukkig was oor die 2015-besluit en van die jonger geslag wat nooit diensplig gedoen het nie, wat sterk teen die 2015-besluit gekant was.

Die argumente in guns van gay huwelike kan nie teologies verdedig word nie, vandaar die 2016- besluit. Huwelik as eksklusief tussen een man en een vrou is natuurlik ‘n fundamentele kerklike leerstelling.

Die brief is dus oneerlik in ‘n poging om die skuld vir die 2016-besluit op ‘n denkbeeldige paternalisme van die Afrikaner te plaas, in plaas van die ware rede dat die 2015-besluit onverdedigbaar is.

Die stelling dat lede wat teen gay huwelike gekant is, dan noodwendig liefdeloos en onverdraagsaam is, is vals. Dit staan nie teenoor mekaar nie. Jesus het nooit mense in hulle sonde gelos nie.