Soos die Israeliete in die woestyn moes agterkom, is water ’n noodsaaklike lewensmiddel en boonop skaars. Water dek 71% van die aarde se oppervlakte, maar slegs 1% daarvan is geskik vir gebruik, want van elke 100 druppels water op die aardbol is slegs drie vars, twee daarvan in ys vasgevang, en die een wat oorbly, grotendeels ondergronds.

Gebruik ons die bloedsomloop as beeld van die aarde se netwerk van riviere, damme en vleilande, blyk dit dat die pasiënt terminaal is: die marine-lewe word ernstig bedreig deur grootskaalse besoedeling soos drywende vastelande-plastiekafval in die oseane; besmetting het verder tot ge­volg dat ongeveer 12 miljoen Suid-Afrikaners nie toegang het tot veilige drinkwater nie – ’n groeiende krisis.

Hoe nou gemaak vir ons pasiënt se oorlewing? Die bloedsomloop is ’n geslote sisteem, ons kan die watervoorraad nie aanvul nie, maar tog versigtig gebruik. Onthou, ons het net die een druppel om van te lewe.