Dis ’n krisis wat nie grense ken nie en verg ’n respons wat nie perke aan vindingrykheid stel nie, berig Conette le Roux oor die tentedorpe en ander omgeeplanne wat beraam word om die mees weerloses teen die Koronavirus te probeer beskerm.

“Toe die president nasionale lockdown aangekondig het, was daar meestal nêrens waar haweloses kon gaan lockdown nie.”

So vertel ds De la Harpe le Roux, besturende direkteur van Torings van hoop in Bloemfontein, wat onder andere ’n daaglikse sopkombuis vir haweloses bedryf.

Maar, sê Le Roux, gelukkig is daar mense soos Hennie Muller.

Sowat 40 km buite Bloemfontein huisves Muller 72 volwasse haweloses op sy kampterrein.

Volgens Muller is die 60 mans en 12 vroue medies ondersoek en kon geen Koronavirus-simptome onder die groep mense gevind word nie.

“Hulle is onder isolasie en die weermag en polisie help toesig hou. Isolasie beteken geen kontak met die buitewêreld nie, behalwe ek en twee helpers wat gereeld moet kos aankoop, want hulle eet verskriklik baie,” lag Muller. Om dit moontlik te maak ondersteun talle individue en organisasies hom.

Muller verduidelik die mense het vir die eerste ruk net ontspan en mekaar leer ken. “Verder is hier 12 mense van Victoria Outreach wat help met geestelike bediening soos die nood ontwikkel,” aldus Muller.

Ds Francois Smit, wat by PEN in Pretoria betrokke is, beaam dat ’n “lockdown” vir haweloses ’n groot probleem is.

“Vandat die besighede toegemaak het, het die kos wat daagliks gegee is, opgedroog. Die chroniese medisyne ook.”

Volgens Smit is hulle tans besig om ’n plek van veiligheid in die middestad van Pretoria reg te kry, daar is verskeie gemeentes wat help om klein groepies te huisves en in Burgerspark is hulle besig om tente vir sowat 200 mense op te rig.

Ds Scherlize Hayes, leraar van die NG gemeente Ysterplaat-Suid in Kaapstad, vertel hulle moes ook heelwat planne maak vir die inperkingtydperk omdat daar soveel weerloses in hulle gemeenskap is.

“Ons was veral bekommerd oor ons kinders wat meestal by die skool en daagliks by die kerk eet (onder normale omstandighede),” verduidelik Hayes.

Hayes sê: “Daarom het die gemeente saam met die laerskool 40 behoeftige gesinne geïdentifiseer en ’n lys van bejaardes saamgestel wat ook op Sassa-toelae lewe.”

Hayes verduidelik verder die aksieplan: “Ek, saam met vier vrywilligers, sal elke Maandag kospakkies (genoeg om sewe dae te hou) by die huise aflewer. Ons lewer ook saam met die kospakkies, aktiwiteitpakkies vir kinders af (klei-, inkleur- en uitknip-aktiwiteite, met Bybelstukkies), en tydskrifte vir bejaardes. Deur die week sal ek gemeentelede telefonies ‘besoek’ en ons lewer (omdat die meerderheid van ons gemeenskap nie toegang tot data en WiFi het nie), eredienste via WhatsApp en SMS.”