’n Gemeente in Christus vir oud en jonk in Vrede!

 

VAKATURE: VOLTYDS-ONBEPAALDE TERMYNPOS

 

Sluitingsdatum vir aansoeke: 31 Desember 2022.

In biddende afhanklikheid stel die NG Kerk Vrede-Wes die bogenoemde vakature bekend en wag met vreugde en vertroue op aansoeke van alle gelegitimeerde predikante en proponente van die NG Kerk wat hulleself geskik ag vir die pos.

Gemeenteprofiel:

Die NG Kerk Vrede-Wes is een van twee gemeentes wat tans die plattelandse gemeenskap op die Vrystaatse dorp, Vrede, bedien. Daar is 310 belydende en 102 dooplidmate in die gemeente. Die gemeente word hoofsaaklik gevoed deur ’n sterk boerderygemeenskap met vier wydverspreide plaaswyke. Daar is ook dorpswyke. Vrede beskik oor ’n goeie laer- en hoërskool en noodsaaklike fasiliteite en dienste wat winkels, ’n dokter en tandarts insluit. Daar is ook ’n tehuis vir bejaardes binne die gemeente se bedieningsgrense.

Leraarsprofiel:

Die geskikte kandidaat moet iemand wees met ’n innige liefde vir die Here en ’n brandende passie vir sy kerk. In die eerste plek is goeie gereformeerde en Skrifgetroue prediking ’n vereiste. Hy/sy moet ook iemand wees wat die liefdesgebod uitleef in sy/haar bediening om sodoende die gemeente met die nodige deernis, liefde en sorg te bedien. Die kandidaat moet ook meelewend wees en ’n uitgaande persoonlikheid hê. Kortom: Die leraar moet vanuit sy/haar roepingsoortuiging ’n goeie en betroubare herder en leraar vir die gemeente wees. Daar sal dus van die leraar verwag word om alle bedieningspligte, soos uiteengesit in Artikel 9 van die Kerkorde, na te kom. Die leraar moet oor administratiewe gawes beskik. Die lei van eredienste met die gebruik van PowerPoint en rekenaartegnologie.

Vergoeding en voordele:

Vergoeding sal met die geskikte kandidaat onderhandel word en wel in oorleg met die beskikbare sinodale riglyne vir die vergoeding van predikante wat mediese en pensioenvoordele insluit. Die gemeente beskik oor ’n ruim en goed versorgde pastorie.

Diensaanvaarding: 31 Maart 2023 of so spoedig as moontlik.

Aansoeke:

Aansoeke kan gestuur word na die kerkkantoor: vredewes@lantic.net.

Die aansoek moet bestaan uit ’n volledige CV van nie meer as drie bladsye nie. Die kandidate moet ook die pre-advieskommissie van drie referente se name en telefoonnommers asook e-posadresse voorsien. Daar sal ook van alle belangstellendes verwag word om ’n vraelys in te vul wat op aanvraag vanaf die kerkkantoor aangestuur sal word. Kandidate op die kortlys mag vir ’n onderhoud en preekbeurt genooi word.

Vir enige verdere navrae skakel gerus:

Die pre-advieskommissievoorsitter, Richard van Staden by 082 323 0241, e-pos Richard.vanstaden@omnia.co.za.

Skriftelike navrae kan aan die skriba by vredewes@lantic.net gerig word.

Die kerkraad behou die reg voor om nie ’n aanstelling uit die aansoeke te maak nie.