Philip Coetzee van die Strand skryf: Ek lees onlangs Willem Louw se brief op 5 November 2025 oor “die kritiek teen die Groote Kerk” waar hy verklaar dat: “Sy (Jesus se) arrestasie en kruisiging was nie toevallige godsdienstige vervolging of die volbringing van profesie nie, maar ’n polities-gemotiveerde poging om ’n rebel stil te maak.” Kom ons kyk na die groter Godsbegrip oor hierdie kwessie: Die kruisiging van Jesus was nie ’n menslike sameloop van omstandighede of ’n politieke komplot nie, maar die uitvoering van God se ewige plan om die wêreld te red. Elke gebeurtenis – van Jesus se verraad tot sy dood en opstanding – het volgens God se besluit plaasgevind.

LEES OOK: Oor geleentheid by Groote Kerk: ‘Liturgiese ruimte behoort aan God alleen’

Jesus self het vooruit gesê dat Hy sou ly, verwerp en gedood word, maar op die derde dag sou opstaan (Luk 9:22). Petrus bevestig later dat, al het mense uit eie boosheid opgetree, dit alles deel van God se vasgestelde besluit en voorkennis was (Hand 2:23).

Selfs die dade van Judas, Pilatus en die soldate was nie toevallig nie – dit het alles bygedra tot die vervulling van die profesieë, soos Jesaja 53 voorspel het. Só wys die Skrif dat die kruisiging nie ’n mensgemaakte tragedie was nie, maar die volmaakte uitvoering van God se verlossingsplan vir die mensdom. Dus, nie ’n mensgevormde inisiatief nie, maar ’n plan binne die raamwerk van God se reddingsvisie vir hulle wat glo en Jesus volg. Daarom moet ons versigtig wees om dit wat in die kerk gebeur, saamaanbidding ensovoorts, te gebruik om gelykvormigheid in die kerk te bewerkstellig (Rom 12:2-3; 2 Kor 6:14).