Julian Olivier van Groblersdal skryf: Met Kersfees praat ons gereeld oor lig, vrede en hoop. Dit is goeie en Bybelse woorde. Maar ek dink Kersfees vra ’n skerper vraag: Waarom moes God self mens word? Waarom stuur Hy nie bloot ’n groot leermeester, ’n morele voorbeeld of ’n politieke bevryder nie?
Die Bybel se antwoord is eerlik en ontstellend: die wêreld se diepste probleem lê nie buite ons nie, maar binne ons.

LEES OOK | Resensies: The holy and the broken + How not to mess up online

Volgens die Christelike belydenis is die mens goed geskape. Ons is gemaak om in gemeenskap met God te leef. Maar deur die sondeval het die mens homself willens en wetens van God losgeskeur. Daarom is sonde nie bloot verkeerde keuses of slegte invloede nie; dit is ’n verdorwenheid van die hele menslike natuur. Gevolglik is selfs ons beste bedoelings gebroke, en selfs goeie strukture altyd vatbaar vir korrupsie.

Dit is hoekom ’n revolusionêr nie genoeg is nie. ’n Revolusionêr kan strukture verander, mag herskik en onreg aanspreek. Dit het soms waarde. Maar hy kan nie skuld wegneem nie. Hy kan nie die hart vernuwe nie. Hy kan nie die mens met God versoen nie. Ons grootste nood is nie net bevryding nie, maar verlossing.

Juis daarom moes God self ingryp. Die Evangelie verkondig nie dat God van ’n afstand af raad gee nie, maar dat God, in die Persoon van die Seun, werklik mens geword het. God die Seun het ’n ware menslike natuur aangeneem – liggaam én siel – sonder sonde. Nie skynbaar nie, nie simbolies nie, maar werklik. Wat nie aangeneem word nie, kan nie verlos word nie. Hy is die nuwe Adam. 

Die inkarnasie lei onafwendbaar na die kruis. God is volkome regverdig: sonde kan nie geïgnoreer of weggeredeneer word nie. Maar God is ook volkome barmhartig: Hy wil nie die sondaar vernietig nie. In Christus ontmoet regverdigheid en barmhartigheid mekaar. God dra self, in die Persoon van die Seun, die straf wat sy regverdigheid vereis, en skenk vryspraak aan dié wat skuldig staan. Nie teen ’n goedkoop prys nie, maar teen die duurste prys denkbaar, die lewe van ons Here Jesus Christus.

Daarom word hierdie Kind Jesus genoem: “Hy sal sy volk van hulle sondes verlos.” Kersfees is nie bloot ’n fees van vertroosting nie, maar is die begin van God se verlossingswerk. Die wêreld het nie in die eerste plek ’n revolusionêr nodig nie, maar ’n Verlosser. Dit is presies wat God in Christus gegee het.