Brief: ‘Bybel sê niks goeds oor selfdegeslag seksuele praktyke in enige konteks nie’

Ds Julian van Groblersdal skryf: Neels Jackson skryf in sy brief (13.07) die volgende: “Die argument is dat liefdevolle en getroue verhoudinge tussen mense van dieselfde geslag nie sonde is nie, en dat liefdevolle seksuele verkeer in sulke verhoudinge ook nie sonde is nie.”

Hierdie argument plaas die aksent op die konteks waarbinne die daad van homoseksuele omgang beoefen word. Dit impliseer dat die konteks waarbinne homoseksuele seks plaasvind vir die Bybelskrywers van belang is. Ons lees selde dat daar oor die verhouding van die individue enigsins in die tekste uitgebrei word. ’n Mens sou dus kon argumenteer dat die tekste nie die verhoudings noem of definieer nie, omdat die konteks waarbinne die seksuele daad geskied nie die hooffokus is nie, maar die aktiwiteit self. Die konteks waarbinne die omgang dus plaasvind veroorloof nie die daad wat veroordeel word nie.

Die lyn van argumentering ignoreer ook die uitdagende taalgebruik van Romeine 1 wat na selfdegeslag seksuele omgang, as aktiwiteit, ongeag die konteks, verwys as ’n “teen-natuurlike omgang.” Hierdie teks bied dus ’n uitdaging vir diegene wat ruimte wil maak vir sulke verhoudinge, omdat die konteks van ’n liefdevolle en getroue verhouding nie homoseksuele omgang kan transformeer na ’n vorm van “natuurlike omgang” nie.

Verskeie teoloë poog om uitsonderings te soek deur die argument te gebruik dat die Bybel na ’n “ander soort homoseksualiteit” (afgodsdiens, tempelprostitusie, sodomie ens) verwys as wat ons vandag ken met ander woorde homoseksuaiteit sonder liefde en trou. Hierdie argument berus dus op die kloof tussen die antieke wêreld en die moderne samelewing. As ons eerlik is, moet ons reguit sê dat die Bybel doodeenvoudig niks goeds te sê het oor selfdegeslag seksuele praktyke in enige konteks nie.

Kevin DeYoung van Amerika skryf in sy boek What does the Bible really teach about homosexuality? dat daar twee groot struikelblokke vir hierdie vorm van argumentering is naamlik:

1) “Silence is not always golden”; Dit meen dat die terminologie wat gebruik word uitsluitlik verwys na gay seks. Stilte in verband met die konteks daarvan beteken nie dat daar uitsonderings is waarbinne die aktiwiteit kan plaasvind nie.

2) Daar is verskeie klassieke literatuur beskikbaar soos byvoorbeeld Bernadette Brooten se boek Love between women: Early Christian responses to female homoeroticism en prof Thomas K Hubbard se werk Homosexuality in Greece and Rome: A sourcebook of basic documents, wat duidelike bewys lewer vir die diversiteit van homoseksuele praktyke in die antieke wêreld, wat verhoudings van liefde en trou insluit.

Dit bewys dus dat die Bybelskrywers die volle diversiteit van homoseksuele praktyke in die antieke wêreld sou ken en alle vorme van homoseksuele omgang in geheel verwerp. Daar is nie ’n enkele teks (in die Bybel) wat gay verhoudinge van liefde en trou aanmoedig of goedkeur nie.