Brief: Help my tog met perspektief op Dag van Verootmoeding

Johannes Froneman van Kleinmond skryf: Verskeie aspekte van vanjaar se Dag van Verootmoediging het my verontrus – tot so ’n mate dat ek maar stilgebly het waar ek as deel van die gemeente instemmend moes reageer.

Ek het dit ervaar as ’n goed bedoelde poging wat mank gegaan het aan ’n deeglike aanloop en verduideliking. Ja, dit is in Kerkbode verduidelik, maar hoeveel gemeentelede het byvoorbeeld geweet wat bedoel is met “God se droom” vir ons land? Hoe kon almal dan met vrymoedigheid sê: “Ons koester steeds daardie droom”?

LEES OOK: ‘Hoe gemaak as die ASM ons telkens terugverwys na verstopte kerkordelike kanale?’

Iewers het ek duidelik agtergebly, want ek is glad nie seker wat “God se droom” vir die land (die Republiek van Suid-Afrika) is nie. Wat word daarmee bedoel? Dat ons ’n paradys op aarde sal skep waar almal werk het en al “God se kinders” vry en amper gelyk sal saamwoon? Luister na dié paragraaf:

“Dit is die droom dat almal in Suid-Afrika ’n werk kry; dit is die droom dat armoede uitgeroei word; die droom dat onderwys op peil kom; dat al ons mense huise en toegang tot water het; dat almal gelyke geleenthede het; dat ongelykheid drasties verminder; dat geweld tot ’n einde kom; dat korrupsie hokgeslaan word, en dat vertroue herstel word. Dit is ’n droom wat diep gewortel is in God se droom vir ons en vir ons land.”

Het die opstellers dit by dr Martin Luther King gehoor of in die Bybel? Is daar ’n verskil tussen God se droom vir Suid-Afrika en vir al die ander lande van die wêreld? Is daar ’n verskil tussen ’n wonderlike politieke toespraak en “God se droom”?

Hier is ’n stuk onderliggende teologie ter sake wat my ongemaklik maak. ’n Tydige verduideliking van “God se droom vir ons land” sou my en ander lidmate gehelp het om dié teologie te verstaan en nie te laat vermoed dat dit ’n stuk reënboognasieteologie op spoor van Desmond Tutu is nie.

LEES OOK: Biogas van beesmis, buitestort en Bosveld-pastorie – Kerkbode kry ‘groen storie’ in Limpopo

Luister wat die teks sê: “Met hierdie geloof sal ons kan saam werk, saam bid, saam stry, saam moeilike situasies deurstaan, saam opstaan vir vryheid, wetend dat ons almal God se kinders is” (my kursivering). En my vraag: Almal?

Verder moet ek ’n vraagteken plaas aangesien die apartheidsteologie ook hemel op aarde wou meebring, soos wat WA de Klerk so briljant uitgewys het in sy boek Puritans in Africa. En ons weet wat dit ons in die sak gebring het.

Terwyl daar veel in die hele inisiatief is wat goed klink, twyfel ek sterk aan die onderliggende teologie. ’n Verduideliking sal help om dit in die regte perspektief te plaas, al is dit dan mosterd na die maal.