Neels Jackson van Nelspruit/Mbombela skryf: Ek reageer op Tinus Diedericks se brief “Die kerk is nie ’n galery vir politieke solidariteit nie” van 29 Oktober 2025.

Lees ook: Kaapse gemeente poog om solidariteit te toon deur gasheer te speel vir Francesca Albanese in brandpuntgesprek oor Israel en Gasa

Teen die agtergrond van die verskraalde evangelie waarmee die NG Kerk baie jare lank gewerk het, verstaan ek iets van Tinus se ontsteltenis. Ek dink egter daar is ’n paar sake waaroor ons moet duidelikheid kry.

1. Mense, en veral mense wat swaarkry, is vir Jesus belangrik. In die verlede het ons die evangelie verskraal sodat Jesus slegs die Verlosser geword het wat kom sterf het sodat ons sonde vergewe kan word. Jesus ís dit, maar Hy is ook die een wat vir ons kom leer het hoe om te lewe. En ’n kerndeel daarvan is dat hy ons kom leer het om om te gee vir mense wat ly. Die evangelies is vol daarvan, maar Matteus 25:31-46 waar Jesus praat oor die laaste oordeel, is ’n besonder duidelike teks wat wys watter belang Jesus heg aan die besorgdheid oor mense wat ly. Daarom is dit gepas dat ’n gemeente ook besorg is oor die lyding van die Palestyne.
2. Ek dink Tinus maak ’n fout deur die Palestynse vlag te sien as “die simbool van ’n geloof en ideologie wat die Godheid van Christus ontken”. Die vlag is eerder die simbool van die Palestynse mense, en onder hulle is daar nie net Moslems nie, maar ook ’n minderheid Christene. Daar is nie net Hamas nie, maar ook gewone mense wat net ’n rustige en stil lewe wil lei, maar wat slagoffers geword het van ’n oorlog wat deur ekstemiste aan beide kante gevoer word.
3. ’n Kerkgebou vervul in ons tradisie nie dieselfde funksie as die tempel in die Ou Testament nie. Die gebou is nie ’n heilige plek waar God woon nie. In ons tradisie is ons liggaam nou ’n heilige tempel waar God woon. Die gebou is ’n gerieflike bymekaarkomplek vir eredienste en ander geleenthede. Ons hoef nie die “heiligheid” van die gebou te probeer beskerm nie.
4. Toe Jesus die tafels in die tempel omgekeer het, was dit omdat die godsdienstiges van die tempel ’n rowersnes gemaak het. Wie was dit wat beroof is? Dit was die armstes wat hulle “sondige” Romeinse munte teen ’n premie by geldwisselaars moes omruil vir “aanvaarbare” geld – dít terwyl die godsdienstiges self met Romeinse geld in hulle sakke rondgeloop het (vergelyk Markus 12:13-17). Jesus verwys ook in Markus 12:38-40 na die skrifgeleerdes wat die huise van die weduwees inpalm. Die tempelreiniging is Jesus se protes teen die uitbuiting van arm mense. 
5. Dit ís so dat ons grondig van die Moslems oor die kern van ons geloof verskil. Dit maak hulle nie ons vyande nie. Ons kan met vriendelikheid ’n mooi kant van ons geloof vir hulle wys. Watter beter getuienis is daar vir die liefdevolle God wat ons aanbid, as om vir Moslems te wys dat hierdie God ook vir die Palestyne omgee?

Die Groote Kerk is die tuiste van die oudste NG gemeente, die moedergemeente waaruit al die ander mettertyd ontstaan het. Ek is dankbaar dat ons moeder vir ons ’n voorbeeld is van hoe God se besorgdheid oor lydende mense beliggaam kan word.